Ka Hōʻoia Ānuenue
Aia ka hoʻomaopopo ʻana i ke ʻano ānuenue kikoʻī e ʻōʻili ana ma ke kuanaʻike o ka mea nānā. ʻO ia hoʻi, nā mea i aʻo ʻia mai e kona ʻohana, kona mokupuni i hānai ʻia aʻe ai, a me nā moʻolelo i hahaʻi ʻia maila. No laila, ua hoʻāʻo ka mea kākau e kui pū i nā ʻike i hōʻiliʻili ʻia mai mai nā kūmole like ʻole no kēia papahana nei i mea e hoʻomaopopo ai i nā ʻano ānuenue a pau. Ma loko o ka Pakuhi o lalo, hōʻike ʻia nā ʻano ānuenue, nā pōʻai lewa nāna e ʻōʻili aʻe mai, nā waihoʻoluʻu, a me nā welo like ʻole. ʻO ia paha kekahi papa alakaʻi nānā i mea e kōkua ai i nā mea nānā ānuenue o kēia au nei.
Nā pōʻai lewa, waihoʻoluʻu, a me nā welo o nā ʻano ānuenue
Pehea e hoʻohana ai i ia papa alakaʻi nānā no ka hoʻomaopopo ʻana i ke ʻano ānuenue o ka mea nānā e ʻike ana? Eia ke kaʻina hana:
1. E hōʻoia ʻia ka hui ānuenue / ka welo mua.
2. E hōʻoia ʻia ka waihoʻoluʻu / nā welo kūlana ʻelua.
3. E mahuʻi ʻia i ka pōʻai lewa / kiʻekiʻena (E nānā ʻia ka hoʻākāka o lalo iho).
4. E hōʻoia ʻia ke ʻano ānuenue.
Pehea e ana ai i ke kiʻekiʻena a me ka pōʻai lewa o ke ānuenue e kau ana? Hiki ke hoʻohana ʻia ka puʻu lima kākāuha no ke ana ʻana i ke kiʻekiʻena o kekahi mea lani. ʻO ke ākea o ka puʻu lima, ma kahi o ʻumi kekelē, ua ʻano like me 3000 kapuaʻi. E nānā ʻia ka Pakuhi a me ke Kiʻi o lalo.
No laila, hiki ke hoʻohana ʻia ia ʻano hana no ka mahuʻi ʻana i ka pōʻai lewa o kekahi ānuenue e kau ana. Eia kahi laʻana o ka hoʻohana ʻia o ia Pakuhi o luna aʻe no ka hoʻomaopopo ʻana i kekahi ʻano ānuenue. E nānā ʻia ke ānuenue ma loko o ke Kiʻi o lalo, he aha kona ʻano ānuenue? E hahai ana i ia kaʻina hana, penei:
1. E hōʻoia ʻia ka hui ānuenue / ka welo mua.
Hāʻina: ʻAʻole he piʻo ānuenue, he hunahuna ānuenue a i ʻole he ānuenue haʻahaʻa. E nānā ʻia ka Pakuhi o lalo aku. Hōʻike ʻia ka hopena i ka helu 1 a me nā huinahā loa ʻulaʻula he ʻelua.
2. E hōʻoia ʻia ka waihoʻoluʻu / nā welo kūlana ʻelua.
Hāʻina: Loaʻa ka hapanui o nā waihoʻoluʻu. Hōʻike ʻia ka hopena o kēia kaʻina wāwae i ka helu 2 a me nā huinahā loa ʻulaʻula he ʻelua. Aia he ʻelua wale nō ʻano ānuenue nona ka hapanui o nā waihoʻoluʻu, a he hunahuna ānuenue hoʻi a i ʻole he ānuenue haʻahaʻa paha. ʻO ia hoʻi ka pūnohu a i ʻole ka pūnohu uakoko. E nānā ʻia ka Pakuhi o lalo no nā huinahā loa ʻulaʻula e hui kaupeʻa ana.
3. E mahuʻi ʻia i ka pōʻai lewa / kiʻekiʻena.
Hāʻina: Ua ana ʻia ke kiʻekiʻena o ka wēkiu o ke ānuenue ma o ka puʻupuʻu lima kākāuha. Malia paha, ʻelua puʻupuʻu lima kākāuha o ke ākea. No laila, ma kahi ia o 6000 kapuaʻi. ʻO ia hoʻi ka lewa lani lewa. Hōʻike ʻia ka hopena o kēia kaʻina wāwae i ka helu 3 a me nā huinahā loa ʻulaʻula he ʻelua. He wale nō ʻelua ʻano ānuenue nona ka hapanui o nā waihoʻoluʻu, a he hunahuna ānuenue a i ʻole he ānuenue haʻahaʻa, a kau i ka lewa lani lewa. ʻO ia hoʻi ka pūnohu a i ʻole ka pūnohu uakoko.
4. E hōʻoia ʻia ke ʻano ānuenue.
Hāʻina: No laila, he pūnohu ia. Hōʻike ʻia ka hopena o kēia kaʻina wāwae i ka helu 4 a me ka huinahā loa ʻulaʻula. No ke aha ka pūnohu? Inā he pūnohu uakoko, e nānā ʻia kona welo kūlana ʻelua hou, ʻo ia hoʻi, nui ka ʻulaʻula. Aia ka uakoko ma lalo o ka pūnohu.
