Ua ʻIke pinepine ʻia ke ānuenue i ka manawa i hānau ʻia ai kekahi aliʻi.  Hiki ke ʻike maopopo ʻia kēia i ka manawa i hānau ʻia ai ʻo Kamehameha V, penei:

​

"...ʻO ka la hanau o ka Moi, oia kona la i puka mai ai mai ka opu mai o kona makuahine, a ma ia la, ua pouli ka aina, ua noho ino na opua, ua paa ke kumu lani ma kauwahi, a ua kaawale ma kauwahi, ua inoino ka moana, ua hakukoi na ale, ua paio na makani, ua hui na welau o ka honua, ua kapio na anuenue, ua kui ka hekili,....."

​

​

Mai ka lekiō:

​

He moʻolelo kēia i haʻi ʻia e Alice Sharden ma ka hōʻike lekiō ʻo Ka Leo Hawaiʻi i ka makahiki 1974.  Ua haʻi ʻia kēia moʻolelo iā ia e kona makuahine e pili ana i ka hoʻolewa o kona kupunakāne (ʻo ia hoʻi ko Alice Sharden kupunakāne kuakahi).  He kanaka ʻano nui ke kupunakāne kuakahi.  Koʻikoʻi nō ʻo ia i kona mau lā.  Ma hope o kona hala ʻana iho i hoʻohihi ʻia iho ai ke kupapaʻu ma loko o kekahi kapa.  Wahī ʻia ʻo ia a paʻa a hoʻomoe i loko o kona waʻa.  ʻAuamo ʻia ʻo ia a hiki i kekahi ana i uka o ke kuahiwi (ma ka mokupuni o Hawaiʻi) a kanu ʻia ma loko o ia ana.  Lawelawe ʻia ka hoʻolewa a ma hope o kēlā i hoʻomaka ai ka ʻohana e hoʻi ma lalo iho.  ʻOiai lākou e hele wāwae ana, hoʻomaka ka ua i mua o lākou,  ʻo ia hoʻi ka ua koko, ka hekawaikoko.  Ua huli kekahi poʻe e nānā ma hope a ʻike ʻia ia waʻa e lewa ana i ka lewa, a hāpai ʻia ka mana o ke kupunakāne kuakahi.  Ua hāpai ʻia kēlā waʻa a luna pono o ka lua pele.  Ma kekahi ānuenue i lawe ʻia ai kēlā waʻa.  Piʻo ke ānuenue mai ke ana a hiki i ka loko o ka lua pele.  Ua hoʻoiho ʻia ia waʻa a komo i loko o ka lua pele.  No ka ʻohana Pele ke kupunakāne kuakahi a ua ʻōlelo ʻia aku e ka poʻe, e hoʻihoʻi ana ʻo ia i kona wahi pono.  

​

​

​

na Hoaloha Westcott