Ka Moʻolelo Hiwahiwa o Kawelo
 

Ka Hōʻike Hoʻopōkole:

​

ʻO Kaweloleimakua (Kawelo) ka meʻe o kēia moʻolelo. Ma ka mokupuni ʻo Kauaʻi, ma Hanamāʻulu, ua hānau ʻia kona mau mākua, ʻo ia hoʻi, ʻo Maʻihuna ka makuakāne a ʻo Malalaikalani ka makuahine. He mau hānau kaikuaʻana ko Kawelo a hoʻokahi ona pōkiʻi. ʻO Kahuelokū (Kawelomaihuna) ka hiapo a ʻo Kamalama ka muli loa. Ua hānau ʻia ʻo Kahuelokū i kahi keiki ʻaluʻalu. Ma hope o kona hānau ʻia ʻana, wahī ʻia ʻo ia i loko o kekahi kapa. ʻO ka noʻonoʻo ihola nō ia o nā mākua i ke kanu paʻa ʻana i ia ʻaluʻalu, akā naʻe, wānana nā kupuna i kahi ola kupaianaha nona. Eia kā, he ʻeʻepa (he ʻiole) ʻo Kahuelokū. 

​

​

I ka lā like i hānau ʻia ai ʻo Kawelo, ua hānau ʻia kona mau hoahānau ʻo ʻAikanaka a me  Kauahoa (he pilikua). No Wailua ʻo ʻAikanaka, a no Hanalei ʻo Kauahoa. ʻOiai ko lākou wā kamaliʻi, ua hānai ʻia ia e kekahi mau kahu hānai ʻē aʻe ma Wailua. ʻO ko Kawelo kahu hānai, ʻo ia kona kupunakāne a me kona kupunawahine. Ua aʻo ʻia mai ʻo Kawelo i ka ʻike kilokilo ao ʻōpua, ke kilo lani, ka pule, a me ka mālama akua. Nui nō ko Kawelo ʻai ʻana, ʻo ia ka ʻai ā manō. Eia kekahi, inaina ʻia ia mau hoahānau ona i kā Kawelo lanakila ʻana i ka lele lupe.

​

I ko Kawelo ʻohana i neʻe ai i Oʻahu, inaina ʻia nō hoʻi kona mau kaikuaʻana i kā Kawelo lanakila ʻana i ka mokomoko a me ka hākōkō. No laila, haʻalele ia mau kaikuaʻana ona iā Oʻahu no Kauaʻi. Noho loa ʻo Kawelo ma Oʻahu, a hele a mākaukau i ka lawaiʻa. Hālalo ʻia kekai iʻa uhu nunui mai ka hohonu o ke kai ma o kekahi paha e Kawelo, ʻo Uhumākaʻikaʻi kona inoa. Ua aʻo mai nō hoʻi ʻo Kawelo i kekahi mau hana kaua i ka manawa ona e noho ana ma Oʻahu.

​

Ua lilo ʻo ʻAikanaka ʻo ka mōʻī o ka mokupuni o Kauaʻi, akā naʻe, he mōʻī ʻino nō ʻo ia. He mea ʻālunu nō, a hana ʻino ʻo ia i nā kūpuna, nā mākua, a me nā makaʻāinana a pau. Kākaʻikahi nō ka mea ʻai no nā poʻe a pau. ʻAʻohe i ʻemo, aia wale nō, ʻo ka ʻuku a me ka liha ma luna o ko nā poʻe poʻo ka mea ʻai no nā poʻe. Ma muli o ka hana a ʻAikanaka, kiʻi ʻia ʻo Kawelo e kekahi kupuna he ʻelua e hoʻi i Kauaʻi no ke kaua ʻana iā ʻAikanaka. Ma mua o kā Kawelo haʻalele ʻana i Oʻahu, kūkulu ʻia kahi heiau e Kawelo mā no kona mau akua ma Waiʻanae, ʻo ia hoʻi, no Kūkalaniʻehu a me Kāneikapualena.

​

Ma ke kaua mua, lanakila auaneʻi kā Kawelo pūʻali i luna o kā ʻAikanaka, a kipaku ua ʻAikanaka iā Hanapēpē. ʻO ia kahi ona e noho ana me ke ʻano ʻilihune. Eia naʻe, he kumakaia kekahi keikikāne a Kawelo, ʻo ia hoʻi, ʻo Kaʻelehā. Ua male ʻo Kaʻelehā i ke kaikamahine a ʻAikanaka. Hōʻike ua Kaʻelehā iā ʻAikanaka i ka mea kaua nāwaliwali o Kawelo, ʻo ia hoʻi ke kaua pōhaku. ʻO ka nou akula nō ia o nā koa o ʻAikanaka i pōhaku he nui iā Kawelo a make, eia naʻe, hoʻōla hou ia meʻe. Ua luku ʻia a make ʻo ʻAikanaka e Kawelo. Hoʻi hou ʻo Kawelo i kona ʻāina hānau ʻo Hanamāʻulu, a noho maluhia ma laila. Aloha ʻia ʻo Kawelo e nā poʻe a pau i kona hana lokomaikaʻi.